Elkartasunaz

ZENBAT aldiz pentsatzen dudan denbora geldirik dagoela!

Telebista piztu eta Pipi Galtzaluze, Marko edo Heidi ikusten

ditut. Modari erreparatuz gero, beti biraka dabilela

konturatzen zara. Gure gaztaroan modan egondako estetika,

barregarria iruditzen zitzaigun duela hamar urte, eta orain

berriz gustuko izan dezagun lortu dute. Askoz etsigarriagoa

gertatzen da politikari begira irudipen berbera geratzen

zaizunean. Hemendik lehen ere pasa izanaren sentsazioa zinez

bihotz-suntsigarri gertatzen da gure bizikidetzari

dagokionean. EHAK eta EAE-ANV alderdiak aurki dira legez

kanpo. Espainiako Gobernuak hala erabaki du eta ez dago

ekidin dezakeenik. Eusko Legebiltzarrak duela urte gutxi

bizi izandako arazo berbera izango du laster esku artean,

hainbeste buruko min eragin dion hori bera. Aurreko hartan,

Legebiltzarraren barne araudia errespetatu eta Justiziaren

aginduak betetzeari uko egin zion. Erabaki hark

inhabilitazioa eta isuna ekarri die Atutxa, Knörr eta

Bilbaori, eta lehengo larunbatean milaka lagunen babesa izan

zuten. Batasuna alderdiarenik ez, ordea. Adierazi zutenez,

kosta egiten zaie euren aurka hain bortizki ari izan zenari

elkartasuna adieraztea. Orain, Batasunaren oinordeko omen

diren alderdiak legez kanpo geratzeko zorian daudenean,

euskal gizarteari elkartasuna eskatzen hasi dira. Bakardade

denak dira gogorrak, baita politikoa ere. Alta, elkartasuna

adiskide dituenei bakarrik adierazten ohituta dagoenak,

arazo latza izan dezake aurrean: besteek ere jarrera bera

hartzeko arriskua. Atutxak ez zuen Sozialista Abertzaleak ez

desegitearen alde egin alderdi horrek une larrietan

eskainitako babesagatik. Oker gabiltza elkartasuna adiskide

ditugunei bakarrik zor diegula uste badugu. Martxa honetan

gaizki behar dugu denok. Batez ere, adiskide gutxi dituenak.

Noticias de Gipuzkoan, XABIER EUZKITZEk Idatzia            

http://www.noticiasdegipuzkoa.com/ediciones/2008/01/31/opinion/lacontra.php